بروح مبادرة اتحولت لردة فعل
وفعل كتير يكتفى بنية فعل
مدلها إيد فى تقل الصبر..
وبروح مغامرة معرفتش لجام
وفعل سابق أى نية وكﻻم
مدتله إيد فى خفة حلم..
إتعلقت إيدها فى دراعه
وإتعلقت روحه فى خفتها..
صحيت على اكتافه جناحات
نساها الزمان وظيفتها..
شاف الطريق فى عيونها
يشبه طريقه زمان..
خدها وطار بيها من مكان لمكان..
زرعلها فى حضنه فدان أمان..
وعلى باب حلمها نفخ بعزم ما فيه
فرد جناحاتها.. وسابها وغاب..
رجع لطريق فيه خطوته التايهة بتستناه
لبسها من تانى ومعاها تاه..
على ضهره رجعت جناحاته الشايبة تنام
و فضله منها احساسه بخفة الطيران..