عندى هوس باﻹيدين من زمان وباحس اللمسة لسان القلب اللى ميقدرش العقل يلجمه..
ضمة كف البيبى الصغيرة حوالين صباعك كأنه بيقولك انت قشة اﻷمان فى الدنيا الجدبدة عليا دى ما تسبنيش.. لمسة اﻷم بالراحة لخد ابنها وكأنه كنزها الهش أوى اللى خايفة تكسره.. ضغطة ايد الطفل على ايد باباه على باب المدرسة أول يوم بتقوله أنا خايف أوى وطبطبة اﻷب اللى بترد متخافش.. لمسة إيد الحبيب اللى بتقول باحبك قبل اللسان.. الإبد المحتارة بين اللمسة والضغطة بتقول عايزك.. حضن اﻹبدين اللى ببدفى الجسم كله.. الكف المرتاح فوق كفك بيقولك انت سكنى..  إيد صاحبك على كتفك وانت فى عز مشاكلك تقولك أنا معاك.. إيد بتمسح دمعتك تقول لو أقدر أمسح حزنك.. إيد جدتك اللى بتترعش وهى ساندة على دراعك بتقول تعبت.. وإيدك تقولها أنا سندك..
إيد تخوف وإيد تطمن..
إيد تبعد وإيد تسند..
إيد بتغرق وإيد بتنقذ..
إيد خرسة وإيد بتنطق..
إبد عمية وإيد بتقرا..
من لمسة..